PADANG – 21 DESEMBER 2025 - Pasca musibah banjir bandang nan malanda kawasan Lambung Bukit, Kecamatan Pauh, Kota Padang, kondisi infrastruktur di daerah tasabuik dilaporkan rusak barek. Jembatan nan manjadi urat nadi transportasi hanyuik tabao arus, samantaro badan jalan putus total, sahinggo mambuek ratusan kapalo keluarga (KK) terisolir.
“Ndak ado kayu janjang dikapieang,” itulah pribahasa nan manggambaran kondisi warga saat ko. Namun, di tangah mularaiknyo akses transportasi, nampak jaleh uniknyo kabasamoan urang Lambung Bukit. Putusnyo jalan jo jembatan indak mambuek warga patah arang.
Mancaliak kondisi nan mamprihatinkan, pemuda Lambung Bukit langsuang bagerak capek manjadi paga nagari. Bersamo tokoh masyarakat, RT/RW, sarato pihak Kelurahan, warga bahu-mambahu mambuka jalan darurat. Langkah ko diambiak supayo roda ekonomi warga tatap baputa jo anak-anak bisa baliak sikola.
Pambukaan jalan darurat ko bisa tajadi berkat kamurahan hati babarapo warga nan merelakan lahan pribadinyo dijadikan akses jalan umum.
"Kami sangaik batarimo kasih ka pamilik lahan nan alah ikhlas tanahnyo dilalui. Kalau indak ado jalan ko, entah ka ma lai kami ka lewat," ujar salah surang warga nan enggan disabuik namonyo.
Samangek gotong royong nan manjadi ciri khas Kota Padang alah dibuktikan sacaro nyata dek warga Lambung Bukit. Kini, bola ado di tangan Pemerintah Kota. Warga sangaik mangharokkan adonyo langkah konkrit dari Walikota Padang, Fadly Amran, Wakil Walikota Padang Maigus Nasir, basamo jajaran DPRD Kota Padang.
Harapan gadang warga adolah supayo jalan darurat nan masih babantuak tanah ko bisa sakironyo ditingkatkan manjadi jalan beton. Hal ko paralu dilakuan mangingat pantiangnyo akses tasabuik untuak mobilitas harian jo mancegah kerusakan nan labiah parah kutiko hujan baliak tibo.
"Semoga dalam wakatu dakek ko ado inisiatif dari Bapak Walikota jo anggota dewan untuak 'manyulap' jalan tanah ko manjadi jalan beton. Kami alah mamulainyo jo gotong royong, kini kami butuh dukungan pemerintah," tutup warga dangan panuah harap. (And)
